दिनांक 28/04/2025 रोजीचा सहकार दरबार

सहकारी चळवळीमध्ये वाढत्या सहकारी संस्थांबरोबरच सभासदांच्या तक्रारीची संख्या व न्यायालयीन प्रकरणांची संख्या वाढत आहे.सभासदांचे तक्रारीचे निरसन वेळेत होणे तसेच तक्रारदार व संस्थांच्या समस्यांचा जलदगतीने निपटारा होणे आवश्यक आहे. या उद्देशाने 100 दिवसांच्या विशेष मोहिमेतंर्गत कोल्हापूर जिल्ह्यामध्ये मा.ना.श्री.प्रकाश आबिटकर,मंत्री, सार्वजनिक आरोग्य व कुटुंबकल्याण तथा पालकमंत्री,कोल्हापूर जिल्हा यांच्या अध्यक्षतेखाली जिल्हा उपनिबंधक, सहकारी संस्था,कोल्हापूर कार्यालयाने दिनांक 28/04/2025 रोजी सकाळी 11.00 वाजता महाराणी ताराराणी सभागृह,कोल्हापूर येथे सहकार दरबाराचे आयोजन करणेत आलेले होते. सहकार दरबार पुर्वीच तक्रारदार यांना त्यांची तक्रार दाखल करण्यासाठी ऑनलाईन सुविधा उपलब्ध करुन देण्यात आलेली होती.या सुविधेमुळे तक्रारदार यांना प्रत्यक्ष कार्यालयात अथवा दरबाराच्या ठिकाणी उपस्थित न राहता, आहे त्या ठिकाणावरुन तक्रारी दाखल करता आल्या.या अनुषंगाने ऑनलाईन 110 अर्ज प्राप्त झालेले होते व प्रत्यक्ष सहकार दरबारामध्ये 68 अर्ज असे एकूण 178 अर्ज प्राप्त झालेले होते. सहकार दरबार मध्ये प्राप्त झालेल्या अर्जावर संबंधित कार्यालयाकडून कार्यवाही करणेत आलेली आहे.